早前有媽媽求救，小朋友身上越嚟越多墨⋯⋯手腳、塊面都有，連嘴唇都有兩粒，到底係咩事呢？有唔少爸媽都表示好想知道答案，就等小編請嚟兒科專科 陳欣永醫生 幫大家解答疑難啦！
唔少家長發現小朋友慢慢長大嘅時候，皮膚上嘅墨越生越多⋯⋯好多家長都會非常擔心，係咪小朋友健康出現問題？上網好人提及生墨好多時同「皮膚癌」、「黑色素瘤」有關，又係咪真㗎？！其實從醫生角度去睇，生墨係好正常，特別喺小朋友嘅成長期及青春期階段生墨係非常正常㗎！
Q：墨是什麼？
墨其實係皮膚上嘅黑色素細胞聚埋一齊，令色素可以肉眼喺皮面上面見得到。佢會喺身體唔同地方出現，有啲小朋友天生就會有一大撻墨，亦有人會喺成長過程入面慢慢喺唔同地方浮現。
Q：點解小朋友以前無咩墨，但會越嚟越多呢？
因為小朋友正值成長階段，而墨最常會喺青春期階段出現，所以屬於正常現象。普通人喺小朋友到成年人期間會有大約有12-20粒墨。
Q：如何判斷墨是否正常？
大部份喺25歲前出現都係正常、良性嘅墨嚟嘅。相信各位家長最擔心就係，啲墨會癌變成黑色素瘤（melanoma），我哋稱之為惡性嘅癌性腫瘤，但其實呢個情況喺小朋友身上係好罕見嘅。
咁我哋可以點樣去判斷一粒墨係咪正常，或者佢有無機會惡化呢？
可以從以下因素去判斷：
- 顏色 Color
顏色是否均勻？會不會有些特別深色，有些特別淺色？ - 邊界 Border
邊界是否平滑？會不會參差不齊？ - 形狀及表面 Shape&Surface
是否會拱起？表面有沒有凸起或是凹凸不平？ - 感覺 Sense
正常嘅墨應該係無感覺嘅，如果發現有麻痺感或痛感，甚至出現流血情況，都係唔好嘅現象。
Q：有幾多粒墨係屬於唔正常？
頭先都提及由小朋友去到成年，普遍人會有12-20粒墨，但都有部份人係例外，天生就好多墨。曾經澳洲有研究指出，15-19歲有皮膚癌或者黑色素瘤嘅少年入面，超過一半人數身體上都有已經超過有100粒墨。雖然唔呢個結果並唔代表有100粒墨或以上就要擔心是否患上皮膚癌或者黑色素瘤，只係數量上如果特別誇張，就需要特別多加留意一下，或者搵醫生密切監測住就會更好啦。
Q：有無需要特別留意嘅生墨位置？
如果墨出現喺陽光容易觸碰或者見到嘅位置（Sun exposed areas），例如頭、頸位置嘅皮膚，亦有可能增加癌變機會率，但並非絕對。陳欣永醫生特意提醒大家：「即係唔係頭皮有粒墨，就需要擔心嘅！」
Q：墨的處理方法
各位家長如果真係感到擔心，都可以選擇去做化驗，甚至選擇割咗佢。不過各位如果有疑問，最好都係向醫生諮詢，等醫生跟進，判斷係咪真係有需要去處理。如果只係良性墨，就唔需要擔心啦！
鳴謝：兒科專科醫生 陳欣永
圖片授權： 媽姬與樂 生活日誌
WhatsApp｜
電郵｜
