唔少家長見自閉症兒童偏食，會考慮俾佢哋透過服食維他命或其他營養補充品，攝取所缺營養。要留意，攝取營養補充品並非越多越好，亦比唔上透過食物攝取來得天然。
究竟點樣可以藉著日常飲食，改善小朋友營養攝取問題呢？舉個例，如果小朋友拒絕飲牛奶，不妨考慮給予其他含有類似營養成分嘅替代品，例如豆腐或豆漿，然後因應其喜好，逐步擴闊食物嘅選擇。
唔少小朋友都鍾意食零食、煎炸及加工食物，例如糖果、薯片、腸仔等。經常進食呢類食物，唔單止對身體無益，更會令佢哋更唔願意進食正餐，到時不但會影響均衡嘅營養攝取，一旦習慣成自然，更會加劇偏食問題，變得難以改變。
