診斷Autism需要符合相關標準，小朋友年紀太細，症狀未必咁明顯，一般要到挨近一歲半至兩歲先能夠斷症，部份症狀唔明顯嘅小朋友（例如以往被稱為亞氏保加症嘅患者），可能要去到學齡甚至中學階段，社交生活出現障礙始被發現行為問題。其實，小朋友喺以下兩個年齡階段，最容易被確診自閉症，家長不妨多留意。
幼稚園K1階段︰小朋友入讀幼稚園前，一般較少同小朋友接觸，甚少社交生活。但當步入校園後，佢哋嘅行為問題就會較容易於日常的社交生活中顯現出嚟，例如同其他小朋友缺乏互動，唔理會別人感受等等，一一浮現喺校園生活中。
小一階段︰升上小學後，學習環境及社交需要同幼稚園時截然不同。唔少小朋友喺初入學期間，由於環境轉變，以及社交技巧未能應付人際關係，容易出現較多行為問題，例如固執，容易發脾氣，甚或唔識理解同學仔嘅感受等，老師同家長宜細心觀察佢哋嘅校園生活，及早作出應對。
