要處理自閉症小朋友偏食問題，首先必須了解佢哋嘅飲食習慣同喜惡，例如會否對食物嘅顏色、質感、煮法同味道有所要求，從而作出針對性處理。其次，父母要控制好個人情緒，切勿強迫小朋友進食，若果加以責難，佢哋只會更加抗拒進食，甚至對進食感到挫折，失去興趣。
此外，父母亦要做好期望管理，唔好妄想佢哋會喺短時間內完全改變偏食習慣。由完全唔肯食特定食物、到嘗試接觸、放入口，都係非常漫長嘅過程，家長必須細心同保持耐性。
如果小朋友願意嘗試接觸呢啲食物，其實係一種明顯進步，家長應該加以鼓勵，希望能令佢哋更有信心去擴闊其接受程度，慢慢養成均衡飲食習慣。
